Святочныя спаборніцтвы
Дню вызвалення Беларусі ад нямецка-фашысцкіх захопнікаў быў прысвечаны таварыскі матч па футболе, што адбыўся ў Глуску 3 ліпеня на цэнтральным стадыёне. Там сустрэліся зборныя каманды аматараў футбола з Бабруйска і Глуска. Пабалець за сваіх, падтрымаць іх спартыўна-баявы настрой прыйшло нямала гледачоў, і гульцы іх не расчаравалі: паказалі цікавую і багатую на вострыя моманты гульню: было забіта 8 галоў. Праўда, перамога ва ўпартай барацьбе дасталася гасцям: бабруйчане выйгралі з лікам 5:3.
У гэты ж дзень на закрытай пляцоўцы стадыёна прайшло першынство па міні-футболе. Спаборніцтвы пра-водзіліся ў рамках раённай спартакіяды сярод работнікаў сельгаспрадпрыемстваў і сельскіх жыхароў. Гульні пра-ходзілі па кругавой сістэме, і кожная каманда правяла па дзве сустрэчы, паколькі на ўдзел у спаборніцтвах было пададзена толькі тры заяўкі. У выніку перамога дасталася футбалістам эксперыментальнай базы “Глуск”, другое месца за камандай аграфірмы “Слаўгарадскі”, трэцімі сталі спартсмены з “Глускай Зары”.
Мабыць, добра, што ўсе ўдзельнікі сталі прызёрамі, але ж, думаецца, было б лепш, каб каманд было больш, тады б і барацьба за месцы атрымалася больш вострай і цікавай.
Т. ЛУГАВАЯ
