Пытанні паступова здымаюцца
Выезды мэтавых мабільных груп на чале са старшынёй райвыканкама Уладзімірам Царыкавым і яго намеснікамі Дзмітрыем Цімчанкам, Аленай Булатоўскай і Аляксандрам Анцюшэнем пачаліся больш за два тыдні таму назад. На сустрэчах, якія праходзяць у аграгарадках і вёсках раёна, у працоўных калектывах Глуска, кіраўнікі аддзелаў райвыканкама, мясцовых службаў даюць адказы на тыя ці іншыя пытанні, што хвалююць насельніцтва. Кожны раз, калі ўзнятыя праблемы носяць грамадска значны характар і закранаюць інтарэсы пэўнай колькасці людзей, газета расказвае пра гэта на сваіх старонках. Магчыма, таму пытанні паступова здымаюцца.
Вось і ў аграгарадку Засценак Усцярхі з вострых праблем, узня-тых перад раённай уладай, была названа праблема рамонту даху ў адным са шматкватэрных дамоў. Пытанне гэта мае сваю гісторыю, і жыльцы ўжо неаднаразова звярта-ліся ў УКП “Жылкамгас”, але, па словах дырэктара прадпрыемства Юрыя Дымшы, вырашыць праб-лему стала магчымым толькі зараз. Кіраўнік паабяцаў, што дах будзе адрамантаваны ў бліжэйшыя дні (зрэшты, работы там ужо вяліся), а калі ў кватэрах з-за працякання даху (а значыць, па віне камунальнай службы) пашкоджана ўнутраная аддзелка, то і гэтыя пашкоджанні будуць выпраўлены за кошт арганізацыі.
Таксама засцянкоўцы пацікавіліся лёсам вясковай лазні: ці ёсць перспектыва таго, што яе зноў адкрыюць? Трэба сказаць, што гэта адно з найбольш вострых пытанняў, і задаюць яго людзі ледзь не пры кожнай сустрэчы. У чарговы раз было патлумачана, што сабекошт адной памыўкі ў сельскай лазні каштуе прыкладна 10 рублёў (пасля дэнамінацыі), плаціць такую суму вяскоўцы наўрад ці будуць, паколькі і тады, калі білет каштаваў у разы меней, жадаючых было няшмат, а браць гэтыя страты на сябе прадпрыемства не можа. Калі да гэтага года розніцу паміж сабекоштам памыўкі і цаной на білет кампенсавала дзяржава, то цяпер такая норма адменена (пастанова Савета Міністраў № 8 ад 11.01.2016).
Т. ЛУКАШЭВІЧ
