Ногі самі ў пляс ідуць
Народны вакальны ансамбль «Азярынка» Калаціцкага Дома культуры наведаў жыльцоў заеліцкага аддзялення кругласутачнага знаходжання для пажылых і інвалідаў раённага цэнтра сацыяльнага абслугоўвання насельніцтва.
Не трэба гаварыць, як бабулі і дзядулі абрадаваліся такім гасцям, яны прыбраліся ў свае лепшыя адзежы і ўсе спусціліся на першы паверх, дзе і адбылося выступленне.
“Сказаць, што канцэрт прайшоў на ўра, — не сказаць нічога. Мы пасля яго яшчэ некалькі дзён хадзілі на такім уздыме! — дзеліцца ўражаннямі кіраўнік ансамбля Зоя Сіраж. — Увогуле, людзі такога ўзросту — заўсёды вельмі ўдзячная публіка, але не столькі апладысменты натхнялі нас на ўсё новыя і новыя песні, колькі тое, якой радасцю свяціліся вочы бабуль і дзядуль”.
Самадзейныя артысты падрыхтавалі для канцэрта спецыяльную праграму, уключыўшы ў яе вясёлыя народныя песні, словы якіх з ахвотаю падхоплівалі і самі слухачы. Кіраўнік ансамбля шкадуе, што не змагла паехаць на гэты канцэрт Зінаіда Коласава, якую ў “Азярынцы” аднадушна лічаць душой калектыву. Артысты спадзяюцца, што на наступны канцэрт у Заеліцы паедуць ужо поўным саставам, а канцэрт гэты не за гарамі — няхай толькі пацяплее, кажа Зоя Сіраж.
Гэтая ж сустрэча калаціцкіх артыстаў з заеліцкімі бабулямі і дзядулямі завяршылася… танцамі. Так-так, дуэт Яўгена Бабічава і Ірыны Жаркевіч (ён грае на гармоніку, а яна на бубне) пасля ўсіх спеваў наладзіў для жыльцоў аддзялення папуры з танцавальных мелодый. Ну й канешне, хто мацнейшы, той пусціўся ў скокі, іншыя ж ад душы пляскалі ў далоні.
Няма чаго і гаварыць, што праводзілі артыстаў да самага парога, зычылі ім здароўя, запрашалі прыязджаць яшчэ.
Аксана ВАСІЛЕЎСКАЯ
Фота Юрыя БАГУКА
