Напярэдадні Дня работнікаў сельскай гаспадаркі і харчавання ў Мінску прайшоў рэспубліканскі форум працаўніц сяла
Для ўдзелу ў ім у сталіцу з’ехаліся прадстаўніцы розных сельскагаспадарчых прафесій з усёй Беларусі.
Глушчанкі там таксама былі. Наш раён на форуме прадстаўлялі Галіна Васілеўская, загадчыца склада ГЗМ “Турыно-агра”, Анастасія Прыбыш, інспектар па кадрах эксперыментальнай базы “Глуск”, Вольга Патапенка, жывёлавод з аграфірмы “Слаўгарадскі”, тэхнік-асемянатар Ганна Улыбіна і лабарант Святлана Грыпінская, абедзве з “Глускай Зары”.
Мерапрыемства з насычанай і разнастайнай праграмай доўжылася два дні, 14 і 15 лістапада. Удзельніцы дэлегацыі праехалі з экскурсіяй па Мінску, наведалі музей гісторыі Вялікай Айчыннай вайны. А галоўныя дзеянні разгортваліся ў Нацыянальным акадэмічным Вялікім тэатры оперы і балета Рэспублікі Беларусь: там прайшла ўрачыстая цырымонія ўшанавання працаўніц сяла, а потым яны паглядзелі балет “Бахчысарайскі фантан”.
“У Мінску была шмат разоў, а вось ні ў музеі, ні ў тэатры да гэтага быць не давялося, — падзялілася ўражаннямі ад паездкі Галіна Васілеўская. — Прымалі нас вельмі добра, выдатныя ўмовы пражывання, на ўрачыстасці выступалі міністр сельскай гаспадаркі Юрый Горлаў, старшыня Беларускага саюза жанчын Вольга Шпілеўская, прэс-сакратар Прэзідэнта Наталля Эйсмант. А балет — гэта штосьці неверагоднае! Яшчэ і падарункі падарылі — наборы касметыкі. Выдатная паездка!”
“Памяць на ўсё жыццё!” — так сказала пра свой удзел у форуме працаўніц сяла Ганна Улыбіна, для яе таксама ўсё ўбачанае было ўпершыню: і музей Вялікай Айчыннай вайны, і тэатр оперы і балета, усё вельмі спадабалася, уражанні самыя лепшыя. Сапраўдны падарунак да свята.
Падарунак гэты да прафесійнага свята для працаўніц сяла падрыхтавалі Беларускі саюз жанчын разам з Міністэрствам сельскай гаспадаркі і харчавання і Беларускім прафсаюзам работнікаў аграпрамысловага комплексу.
Т. ЛУКАШЭВІЧ
Фота дадзена Ганнай Улыбінай
