У першыя месяцы пасля дэнамінацыі ў Беларусі эксперты прагназуюць усплёск падробак
У першыя месяцы пасля дэнамінацыі ў Беларусі эксперты прагназуюць усплёск нізкаякасных падробак. Аб гэтым 26 красавіка паведаміў журналістам намеснік старшыні Дзяржаўнага камітэта судовых экспертыз Сяргей Яўмененка.
«Усплёск так званых фанцікаў — падробак не вельмі высокай якасці — чакаецца незадоўга да дэнамінацыі і ў першыя месяцы пасля яе. Пакуль што фальшываманетчыкі бачаць новыя грошы толькі на малюнку, таму толькі праз нейкі час магчыма з’яўленне больш «якасных» падробак», — сказаў Сяргей Яўмененка.
Начальнік галоўнага ўпраўлення крыміналістычных экспертыз цэнтральнага апарату Дзяржаўнага камітэта судовых экспертыз Беларусі Дзмітрый Гулідзін дадаў, што ступень аховы беларускіх грошай новага ўзору вельмі высокая, і адрозніць падробку пры ўважлівым разглядзе будзе адносна проста нават звычайнаму чалавеку. Дзмітрый Гулідзін звярнуў увагу, што пасля дэнамінацыі Беларусь абзавядзецца манетамі, вывучыць знешні выгляд якіх трэба было б асабліва дасканала з-за таго, што спосабы аховы такога віду грошай грамадзянам малавядомыя.
